Талдықорғандағы  ардагерлер үйінің ғимаратында «Тәуелсіздікке тарту!» атты  кітап табыстау акция өтті. Қалалық ішкі саясат бөлімінің ұйымдастыруымен өткен бұл бастама Елбасының «Болашаққа бағдар: рухани жаңғыру» бағдарламасы аясында қолға алынған. Шараға  шаһардағы Мұхтар Арын атындағы №24 лицейдің ұстаздары мен оқушылары арнайы шақырылып,  ҚР Мәдениет қайраткері, танымал актер Әлімғазы Райымбеков, қалалық мәслихаттың депутаты, Өтенай ауылдық Мәдениет үйінің директоры Бақытай Түстікбаев, БАҚ өкілдері және кітапхана қызметкерлері қатысты.

Жиналған қауым алдында сөз алған қалалық ішкі саясат бөлімінің басшысы Әділет Рымтайұлы: — «Бұл шараның басты мақсаты – жас жеткіншектерге кітап оқудың артықшылықтарын жан-жақты түсіндіріп, рухани құндылықтарды кеңінен дәріптеу. Әрі өскелең ұрпақты жастайынан отансүйгіштікке баулу арқылы олардың бойына ұлтымыздың салт-дәстүрін, әдеп-ғұрпын, дінін, тілін, төл мәдениетін сіңіру», – деп атап өтті.

Осыдан соң абыз ақсақал Әлімғазы Райымбеков пен Қазақстан Жазушылар Одағының мүшесі Нұртай Қыдырәліұлы жастарға тәрбиелік мәні зор  құнды ой-пікірлерін айтып, ақ баталарын арнады.    Ал,  қоғам белсендісі Рысбай Оқуұлы ұзақ уақыттан бері өзінің жеке кітап сөресінде сақтаған том-том кітаптарын қалалық кітапхана қорына сыйға тартты. Осы орайда ол: «Кітап – рухани қазына. Сондай-ақ, әрбір оқырман үшін құнды мұра. Сондықтан  бұл кітаптар көп адамдардың ой өрісін кеңейтіп, оларға өткен тарихтан өшпес үлгі-өнеге сыйлайды деп ойлаймын», — деді.

Шара барысында «Талдықорған әуендері» ансамблінің әншілері ұлт рухын асқақтатар әндерден шашу шашып, ақындар жан тебірентетін жырларын оқыды.

 

Бөлісу
Share on FacebookTweet about this on TwitterEmail this to someoneShare on VK