ҚР ҰҚК Шекара қызметі Жетісу облысы бойынша департаментіне қарасты Алакөл ауданы бойынша шекара басқармасының «Арасан» шекара бөлімшесінде «Ашық есік» күні өтті. Іс-шара департаменттің қолдауымен, бөлімшесі бастығының орынбасары аға лейтенант Тасқын Даулбай мен алғашқы әскери және технологиялық дайындық пәнінің оқытушы-ұйымдастырушысы Серікжан Қанапияның ұйымдастыруымен өткізілді.
«Жас шекарашы» үйірмесінің тобына кіретін Ақсу ауданы, Қапал ауылының кәсіптік және техникалық колледжінің 2-курс студенттері іс-шараға белсене қатысты. Сабақ барысында «ҚР Мемлекеттік шекарасын күзету және қорғауда қолданылатын күш пен құралдар» тақырыбында шекарашылардың жұмыс тәсілдері мен арнайы құрал-жабдықтары таныстырылды.
Бұл тәжірибелік сабақ студенттердің шекара қызметінің маңыздылығын терең түсінуіне, отансүйгіштік қасиеттерін дамытуға және болашақ мамандық таңдауына оң әсерін тигізді. Іс-шара жоғары деңгейде ұйымдастырылып, қатысушылар тарапынан үлкен қызығушылыққа ие болды.
ҚР ҰҚК Шекара қызметі Жетісу облысы бойынша департаменті
