ҚР ҰҚК Шекара қызметі Жетісу облысы бойынша департаментіне қарасты «Қорғас» шекаралық басқармасында көптен күткен қуанышты күн өтті. Көктемнің алғашқы айында қорғастық шекарашылар қауымы ерекше салтанатқа куә болды. Оған себеп — «Оқу орталығының» салтанатты түрде ашылу шарасы.
Аталған айтулы тарихи шараға Жетісу облысы бойынша департаменті бастығының орынбасары, шекаралық бақылау басқармасының бастығы, «Қорғас» шекаралық бақылау басқармасының бастығы, офицерлер мен бөлім басшылары, сондай-ақ жаңа орталықта білім алатын жас сарбаздар қатысты. Сонымен қатар саптық алаңда шекаралық бақылау басқармасына қарасты бөлімдер мен бөлімшелердің лауазымды тұлғалары да болды. Шекара сақшылары жиналған алаңда Қазақстан Республикасының Әнұраны шырқалып, іс-шараны жүргізу құрметі подполковник Глеб Рыбалкинге берілді. Ол өзінің бастама сөзінде жаңа оқу орталығының әскери қызметшілер үшін маңыздылығын атап өтіп, оның болашақта білікті мамандардың ұстаханасына айналарына сенім білдірді.
Алғаш сөз алған полковник Алексей Якуба жиналған қауымға арнаған сөзінде:
— Бүгін «Қорғас» шекаралық бақылау басқармасының тарихында айрықша күн. Басқарманың тарихында алғашқы рет ашылғалы отырған орталық – шекарашылардың білімін шыңдайтын, қызмет сапасын арттыратын ерекше орынға айналары сөзсіз. Құрметті шекарашылар, сіздер – еліміздің қырағы сақшысызыдар, сіздердің кәсіби шеберліктеріңіз бен жауапкершіліктеріңіз – мемлекеттің қауіпсіздігіне тікелей әсер етеді. Осы орталықта алған білімдеріңіз сіздерді өз ісінің нағыз маманы етуге көмектесетіні белгілі. Баршаңызды осы тарихи күнмен құттықтаймын! – деді.
Өз кезегінде шекарашы ардагер запастағы пропорщик Почунай Зульрова да жылы лебізін білдірді:
– Құрметті шекарашылар, бүгінгі мереке ерекше маңызға ие. Себебі бұл күн Наурыз мейрамымен және тағы басқа мейрамдардың соңын ала беріп, қасиетті Рамазан айымен тұспа-тұс келіп отыр. Сіздерге тұрақтылық, мол табыс, зор денсаулық тілеймін. Шекара – бұл елдің айнасы. Бақылаушылар – Шекара қызметінің бет-бейнесі. Сіздер әрқашан мұқият, жинақы және сыпайы болуларыңыз керек. Бұл орталықта алынған білімдеріңіз сіздерді білікті маман етіп қалыптастыруға үлкен септігін тигізеді! – деп, өзінің жүрекжарды тілегін жеткізді.
Салтанатты жиыннан соң қызыл лента қиылып, шараға жиналғандар жаңа оқу орталығының ғимаратына бас сұқты. Келген қонақтар жаңа ғимараттың мүмкіндіктерімен, оқу кабинеттерімен, шеберлікті арттыруға арналған жұмыс орындарымен және шекарашылардың кәсіби дағдыларын дамытуға арналған құрал-жабдықтармен танысты.
«Алтынкөл» шекаралық бақылау бөлімінің офицері, майор Асем Боранғазиева сөз алып, курсанттарға:
– Құрметті шекаралық бақылау қызметінің мамандары! Бүгіннен бастап сіздер жаңа оқу кезеңіне аяқ бастыңыздар. Шекара – бұл мемлекетіміздің қақпасы, ал сіздер – осы қақпаны күзететін абыройлы шекара сақшысыздар. Жаңа оқу орталығы сіздердің кәсіби дамуларыңызға ықпал етеді деп сенемін. Сіздерден талап етілетіні – білімге деген құштарлық пен адал қызмет! – деп, жаңа оқу жылына сәттілік тіледі.
Өз кезегінде «Нұр Жолы» шекаралық бақылау бөлімінің жас маманы, аға сержант Ерсұлтан Құдабек:
– Мен бұл оқу орталығында алған білімімді қызмет барысында тиімді қолданатыныма сенімдімін. Ел шекарасын қорғау – үлкен жауапкершілік. Біздің әрқайсымыз өз міндетімізді адал атқарсақ, еліміздің шекарасы бүтін, халқымыз аман, жеріміз тыныш болады. Осындай мүмкіндікті сыйлаған басшылыққа алғысым шексіз, – деп, өз ойымен бөлісті.
Шекарашылар – ел шебінің сақшылары. Олардың кәсіби дайындығы мемлекет қауіпсіздігінің басты кепілі. «Қорғас» шекаралық басқармасында ашылған жаңа «Оқу орталығы» осы асыл міндетті абыроймен атқаруға дайын мамандарды тәрбиелеуге зор үлес қосатыны анық. Бұл орталық – болашақ шекарашылардың білім ошағы, кәсіби біліктілікті дамытудың жаңа баспалдағы!
ҚР ҰҚК Шекара қызметі Жетісу облысы бойынша департмаенті
