Бүгін Талдықорғанда  Қазақстан Республикасының Мемлекеттік Рәміздер күніне арналған «Мемлекеттік Рәміздер – Тәуелсіздік белгісі» атты салтанатты шара өтті, — деп хабарлайды taldykorgan-online.kz

Шараның негізгі мақсаты – қала тұрғындарының,  әсіресе жастардың рәміздерге деген құрметін арттыра отырып, оларды Отансүйгіштікке тәрбиелеу.

Мерекелік басқосуда сөз алған Талдықорған қаласының әкімі Ғалымжан Райылұлы жиналған қауымды рәміздер күнімен құттықтап, өзінің жылы лебізін білдірді.

Біз Тұғыры биік Туымызбен, айбынды Елтаңбамызбен, асқақ Гимнімізбен әлемге танылдық. Желбіреген көк Ту халық арманын асқақтатып, еліміздің рухын биікке көтереді. Елтаңба – берік шаңырақ және халық татулығын дәлелдейді. Ата — бабамыздың ғасырлық арманын «Менің Қазақстаным» әні жеткізеді. Бұлар – Қазақстанның жаңа тарихының қастерлі беттері. Отан атты қасиетті ұғым да – Ту, Елтаңба және Гимнен бастау алады. Бұл Елбасының саясатының баяндылығы, аса зор отансүйгіштік қасиеті және елімізді әлемдегі ең дамыған мемлекеттер қатарына қосуға деген зор ынтасы, ерен еңбегінің нәтижесі. Сондықтан да, сүйікті Отанымыз – Қазақстан Республикасының Туын, Елтаңбасын, Гимнін тұмардай қасиет тұтып, көздің қарашығындай сақтау әрбіріміздің қасиетті борышымыз, — деді шаһар басшысы.

Сонымен қатар, қала әкімі: Құрметті талдықорғандықтар! Мемлекеттік рәміздеріміз «Мәңгілік ел» атты ұлы мақсат жолында бағыт беретін шамшырағымыз деп білеміз. Көк байрағымыз әрдайым жоғарыда желбіресін, Елтаңбамыз Отанымыздың абыройын асқақтатып, Гимніміз салтанатты жағдайларда шарықтасын. Баршаңызға амандық, отбасыларыңызға береке, дендеріңізге саулық тілеймін. Мереке құтты болсын!, — деді Ғ.Әбдірайымов.

Осыдан кейін мемлекеттік қызметке алғаш рет қабылданған жас мамандар Қазақстан Республикасының Конституциялық заңдарын сақтауға, халыққа адал қызмет етуге салтанатты түрде ант қабылдады. Сондай-ақ, 16 жасқа толған азаматтарға куәлік тапсырылды.

Мерекелік шара концерттік бағдарламамен жалғасын тапты. Жетісудың жез таңдай әншілері мен мың бұралған бишілері өнер көрсетіп, көптің көңілінен шықса, шараға құрметті қонақ ретінде арнайы шақырылған еліміздің танымал әншісі Гүлнұр Оразымбетова рухты әндерін шырқап, көрермен көзайымына айналды.

Одан бөлек, эстрада жұлдызы Талдықорған қаласының жыл сайын гүлдей құлпырып келе жатқандығына тоқталды. Оның айтуынша, облыс орталығы еліміздегі ең әсем, ең таза, көрікті шаһарлардың бірі. Белгілі әнші қала тұрғындарын мерекемен құттықтап, ақ тілегін ақтарды.

Айта кетейік, 1992 жылы 4 маусымда ҚР Тұңғыш Президенті Н.Ә.Назарбаев «Қазақстан Республикасының Мемлекеттік рәміздері туралы» Конституциялық Заңға қол қойды. Содан бері жыл сайын 4 маусым Қазақстан Республикасында Мемлекеттік рәміздер күні ретінде мерекеленеді.

Мемлекеттік рәміздер – бұл кез келген мемлекеттің егемендігі мен біртұтастығын бейнелейтін, оның ажырағысыз атрибуттарының бірі. Қазақстан Республикасында Мемлекеттік ту, Мемлекеттік елтаңба және Мемлекеттік гимн мемлекеттік рәміздер болып табылады.

Бөлісу
Share on FacebookTweet about this on TwitterEmail this to someoneShare on VK