Наурыз- ұлтымыз үшін ұлық мереке. Бүгінде түбі бір түркі халықтары арасында әлемнің 30-дан астам елінде тойланатын бұл күннің орны ерекше.  Биылғы Наурыз мейрамы жер жәннаты Жетісудың бас қаласы Талдықорғанда айрықша сән- салтанатпен аталып өтілді.

Сақталған  салт-дәстүр бойынша, «Жастар» саябағы аумағында  өткен дүбірлі тойға өңір тұрғындарымен бірге Алматы облысының әкімі Амандық Баталов,  шаһар басшысы Дастан Шалтабаев, ардагерлер және басқа да саланың жетекшілері қатысты. Мерекелік шара «Наурыз тал отырғызу» атты, бағдарламамен  қаладағы жаңадан бой көтерген №28 орта мектеп ауласына ағаш егуден басталып, баспанаға мұқтаж жандарға 56 пәтерлі көпқабатты тұрғын үйдің кілті табыс етілді.  Осыдан соң, жұртқа «Жастар» спорт кешені маңындағы үйлерде  жеті түрлі дәннен дайындалған 5 мың литр наурыз көже, бір тоннаға жуық баурсақ тегін үлестірілді.

 

Жалпы, шара барысында Жетісу телеарнасының 20 жылдығына журналистер арасында асық ату, арқан тару сынды бірнеше  ұттық ойын түрлерінен сайыстар ұйымдастырылып, жеңімпаздар бағалы сыйлықтармен марапатталды.Сонымен бірге, азаматтардың қара күшін анықтайтын қошқар көтеру, қазақ күресі, басқа да спорттық ойындар мен домбыра жасау, ши тоқу, сынды қолөнер бұйымдарынан және сызба сурет көрмесі өтті.

 

 «Жастар» саябағының әсем безендірілген ашық сахнасында «Бата»,  «Шашу», «Табиғаттың оянуы», «Наурыз көже»  «Наурыз шешек» атты театрландырылған қойылымдар көпшілік назарына ұсынылды. Жиналған қауым алдында сөз алған Амандық Ғаббасұлы жалпы жетісулықтарды мерейлі мерекемен құттықттап, Әз Наурыз – еңсесі биік елдіктің, іргесі бекем бірліктің, сарқылмас ырыстың бастауы. Ұлыстың ұлы күнін халқымыз жыл сайын шат көңіл, кең пейілмен қарсы алады. Бұл мереке  Қазақстан халқын достық пен татулыққа шақырып, игі істерге жұмылдырып келеді. Біздің салт-дәстүрімізді жаңғыртып, ұлттық рухымызды көтереді. Сондықтан бізге үнемі жақсылығын нәсіп ете берсін деген ізгі тілегін жеткізді.

Шара соңы «Наурыз шашу» атты, аймақ және Қазақстан эстрада жұлдыздарының концерттік бағдарламасымен  жалғасты.

Бөлісу
Share on FacebookTweet about this on TwitterEmail this to someoneShare on VK