Жыр құлагері — Мұқағали

53
Дереккөз

XX ғасырдың екінші жартысында поэзия әлеміне өзгеше қарқынмен һәм ерекше құбылыс болып келген ақындар шоғыры қазақтың классикалық әдебиетінің үлгісін көрсетті. Олар тың ізденістері арқылы үлкен шығармашылық қадамдарға барып, өзінше бір жеке мектептер қалыптастырды. Сол қабырғалы ортаның  ұлы өкілдерінің бірі — Мұқағали Мақатаев. Ақиық ақынның туған күнін жыл сайын кітапханаларда мерекелеу дәстүрге айналғаны қашан.

Дереккөз

Биыл мұзбалақ ақын Мұқағали Мақатаевтың шығармашылығын насихаттауда Қапшағай қалалық кітапханасы «Қапшағай арнаулы әлеуметтік қызмет көрсету орталығы» КММ-де «Ғасырдың лирик ақыны» атты әдемі, әрі әсерлі поэзия кешін ұйымдастырды. Мекеменің әлеуметтік жұмыс маманы Ж.Атаева Тәңіртаудың «мұзбалағы»  атанған қазақтың әдеби тілінің шынайылығын жан сала қорғап, өлең сөзін әртүрлі тіл безеуден, бүлінулерден құтқарып, поэзияда тек қана «іші алтын, сырты күміс сөз жақсысын келістірудің» жолдарын нұсқаған ақын өлеңдерін оқыса, кітапханашылар ақынның кітаптарынан көрме ұйымдастырып, оған шолу жүргізді.
Кітапхананың тұрақты оқырманы, ақын ізбасары Әнел Жансеркенова әсем ән орындаса, шараға қатысушы қарттар ақын өлеңін әндетіп, көзін көрген ақсақалдар естеліктерімен бөлісті. Сонымен қатар, бүгінгі қазақ поэзиясының аса көрнекті өкілі М.Мақатаевтың мол мұрасын шараға қатысушыларға, оқушыларға насихаттау, ақынның шығармашылығын дәріптеу, өзіндік ерекшеліктерін анықтау, ақынның туған жерге, елге деген сүйіспеншілігін жеткізу мақсатында Шеңгелді ауылдық кітапханасы мен Мәдениет үйінің ұйымдастыруымен ақиық ақын М.Мақатаевтың туғанына 88 жыл толуына орай «Мұқағали – мәңгілік ғұмыр» атты поэзия кешін өткізді.
Шара ауылдық кітапхананың оқу залында өткізіліп, шараға Шеңгелді ауылдық округінің әкімі Е.А.Қойлыбаев, Қапшағай қаласы мәслихатының депутаты Ғ.А.Жылқыбаев, ауыл ақсақалдар алқасының төрағасы М.Әбенұлы, кітапхана жанынан құрылған «Жерұйық» клубының төрағасы, ақынмен бірге талай қызмет атқарған жерлесі Б.Атагелдиев, жергілікті қаламгер І.Тойшыбайұлы, ауылдың сыйлы азаматтары мен №6 орта мектептің оқушылары қатысты. Шараны мәдениет үйінің директоры Р.Медеубаев ақынның «Үш бақытым» өлеңін термеге салып, көркем орындады. Шара барысында А.Атагелдиев ақынның бірге жүргендегі естеліктерімен бөлісіп, өмір жолынан сыр шертті. Шараға қатысушылар ақынның шығармашылығына жылы лебіздерін білдіріп, оқушылар ақынның өлеңдерін жатқа айтты.

Қапшағай қалалық кітапханасының баспасөз қызметі

Бөлісу
Share on FacebookTweet about this on TwitterEmail this to someoneShare on VK