Бүгін Талдықорған қаласының әкімі Дастан Шалтабаев №25 орта мектепте саяжай қоғамдастықтарының, Солтүстік-Батыс және Батыс тұрғын аудандарының тұрғындары алдында есеп берді, — деп хабарлайды taldykorgan-online.kz

Жиынның күн тәртібіне сәйкес, шаһар басшысы алдымен өткен жыл қала үшін жағымды жаңалықтар мен толағай табыстарға толы болғанын жеткізді. Артынша Дастан Тұрарбекұлы қала көлеміндегі атқарылған игі істер мен орындалуға тиісті міндеттерді кеңінен атап өтті.

Күн тәртібіндегі барлық мәселелер тыңдалып болған соң жұртшылық көкейде жүрген сауалдарын қойды. Тұрғындардың айтуынша, қар жауғанда кіші көшелер мүлдем тазаланбайды. Автобустардың жүру кестесі дұрыс емес, суық күндерде қоғамдық көлікті балалар ұзақ күтіп тұруға мәжбүр. Жүргізушілердің тәртібі көңіл көншітпейді.

Сонымен қатар, Әлімжанов пен Қабанбай көшесінің қиылысына бағдаршам немесе жүргіншілер өтетін жол қажет. Ғалымжан Халитов көшесінің атауы «Хамитов» деп өзгеріп кеткен. Тұрғындар осының кесірінен жедел жәрдем немесе такси қызметі үнемі адасып жүретінін айтады. Айманов көшесі газ құбыры тартылғаннан кейін қалпына келтірілмеген. Шайқорған елдімекенінде көше атауларын ретке келтіру керек, үйдің нөмірлері дұрыс емес. Сондай-ақ, қаңғыбас иттердің қатары көбейген.

Аталған сұрақтардың барлығына Дастан Шалтабаев толыққанды жауап беріп, тиісті шаралар қолға алынатынын жеткізді. Жиын соңында қала әкімінің есебін тыңдауға келген жұртшылық «қанағаттанарлық» деген баға берді.

Бөлісу
Share on FacebookTweet about this on TwitterEmail this to someoneShare on VK