Тәуелсіздік күні қарсаңында Алматы облысының әкімі Амандық Баталов ауыл шаруашылық саласындағы еңбеккерлермен кездесті. Талдықорғандағы І.Жансүгіров атындағы Мәдениет сарайында өткен жиында аймақ  басшысы алдымен арнайы ұйымдастырылған азық-түлік көрмесін аралап, аймақтағы әрбір аудан, қаланың жылдық табыстарымен танысты. Осыдан соң аталған саладағы атқарылған істерге кеңінен тоқталып, алда тұрған мақсат-міндеттерді айқындады.

Шаруалардыкәсіби мерекелерімен құттықтаған Амандық Ғаббасұлы: «Ауыл шаруашылығын дамыту ел экономикасын еселеудің негізі. Бұл бағыттағы біздің атқаруға тиісті істер мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа Жолдауында анық атап көрсетілген. Соның ішінде Елбасы агроөнеркәсіп кешендерін толық іске қосып, нарыққа қажетті, бәсекеге қабілетті өнімдер өндірісін өркендетуді қадап тапсырған болатын. Міне, бұл аймақтағы жасалып жатқан барлық жұмыстарды одан әрі жетілдіруге тың серпін берді. Осыған сәйкес, жыл сайын мемлекеттен ауыл шаруашылығын дамытуға баса мән беріліп, қомақты қаражат бөлініп келеді. Соның нәтижесінде өңірдегі өндірілген өнім көрсеткіштері еселеп артты. Мәселен,  биылғы 10 айдың ішінде жалпы, Жетісу жерінде  591 млрд. теңгенің өнімі өндіріліп, тамақ өнеркәсібі бойынша 423 млрд. теңгенің азық-түлігі шығарылды. 57 млн. АҚШ долларының өнімі экспортталып, нақты көрсеткіш өткен жылдың ұқсас мезгілімен салыстырғанда 1.8 есеге өсті. Сондай-ақ, ірі қара мал етін экспорттау бұрынғы жылғы 80 тоннадан 1000 тоннаға дейін көбейді. Жыл соңына дейін «Трансұлттық» компанияның қатысуымен азық-түлік шығаратын «Маревен Фуд», «Империя Фуд» сынды бірнеше ет өнімдерін өңдеу кешені іске қосылмақ», – деді.

Жалпы, аймақта 2017-2021 жылдарға арналған мемлекеттік бағдарламаларды  жүзеге асыру бағытында, 36.6 млрд. теңге қаражат бөлінген. Оның 24.4 млрд. теңгесі қайтарымсыз субсидия. Сонымен бірге, жыл сайын егістік жер көлемі де ұлғайтылып, қызылша алқабы 11.2  мың гектарға жеткен. Алдағы бірнеше жылда қызылша егілетін аумақты 16 мың гектарға жеткізу көзделген. Осыған сәйкес, аймақта қазір Ақсу, Көксу қант зауытттары тоқтаусыз жұмыс істеп тұр. Биыл, яғни, 2018 жылы жетісулық диқандар 440 мың тонна тәтті түбір жинап, әр гектар жерден орташа есеппен 400 центнерден өнім алып, бұрын болмаған рекордтық  көрсеткіш орнатқан. Оның үстіне соңғы үш жылда ауыл шарашылығын түрлі құрал-жабдықтармен қамтамассыз етуге жергілікті бюджеттен 5,6 млрд. теңге  бөлініп, 529 озық үлгідегі заманауи техника сатып алынған. Қазіргі уақытта облыста 39 СДО жұмыс істеп, оларға 942 ауыл шаруашылық техникасы қызмет көрсетсе, келесі жылы тағы 5 сервистік дайындау орталығын ашу жоспарда.

Сонымен қатар, мал шаруашылығының  жеткен жетістіктерді де аз емес. Мысалға, биылғы көрсеткіш 4.4 пайызға өсті. Облыста бүгінгі күні 92 мал бордақылау алаңы мен 68 сүт  фермасы жұмыс істейді. Оған  қоса тағы 4300 басқа арналған 7 мал бордақылау алаңы, 1950 сауын сиырға лайықталған 4 сүт зауытының құрылысы жүріп жатыр. «Сыбаға» бағдарламасы бойынша 3 мың бас ірі қара, 14 мыңнан астам ұсақ мал сатып алынды. Әрі облыстың агроөнеркәсіп саласына 57,2 млрд. теңге инвестиция тартылып, 30 инвестициялық жоба жүзеге асырылуда. Бұған қоса мыңға жуық жаңа жұмыс орындары құрылды. Нақтырақ айтқанда, 2013 жылы облыста 377 млрд. теңгенің ауыл шаруашылығы өнімі өндірілсе, биылғы жылы оның көлемі 700 млрд. теңгеден асты. Осы жетістіктердің барлығы да «Жұмыла көтерген жүк жеңіл» демекші, бірлесе жасалған жұмыстардың нәтижесі, – дейді өңір басшысы.

Осы орайда, көрмені аралаған аймақ басшысын облыс орталығындағы шаруалардың тыныс-тіршілігімен таныстырған Талдықорған қаласының әкімі Дастан Шалтабаев: «Жалпы, қазір Талдықорған қаласына қарасты 356 шаруа қожалығы бар. Олардың дені мал және егін шаруашылығымен шұғылданады.  Мал басы да айтарлықтай өсті. Бүгінде қалаға қарасты егістік жер көлемі 6 мың 500 гектардан асады. Оған  арпа, бидай, жеміс-жидек, жүгері  басқа да  майлы дақылдар мен өңірдің төл өнімі қант қызылшасы себілген. Биылғы шаруалардың  өнім көрсеткіші де жаман емес, табыстарымыз да толағай. Көпке мәлім қаламызда заманауи үлгіде жабдықталған жалпы сыйымдылығы 8 мың тонналық 3 астық  қамбасы,  15 мың тоннаға жуық өнім сақтайтын 11 көкөніс қоймасы, 8 жылыжай бар. Соның ішінде «Когер ЛТД»  құс шаруашылығының орны ерекше. Оның бір жылдық жұмыртқа өндіру қуаттылығы 450 млн. дана. Ол елімізбен қатар шетелдерге де шығарылуда. Мысалға, биылығы жылы талдықорғандық «Когер ЛТД» құс өсіру алаңынан Ауғанстанға 30 млн. дана жұмыртқа экспортталды. Алда осындай игілікті істер өз жалғасын таба береді», – дейді.

Басқосу соңында аймақ әкімі ауыл шаруашылығы өнімін қайта өңдеу кәсіпорындарының жеңімпаздары мен үздіктерін марапаттады. Оларға бағалы сыйлықтар мен қаржылай сыйақылар табысталды.  Атап айтсақ, «Үздік ауыл шаруашылығы өнімдерін өндіруші мен өңдеуші» номинациясы бойынша топ жарған Балқаш ауданындағы «Жақсылық» шаруа қожалығы және Еңбекшіқазақ ауданы «Адал» АҚ-ның жетекшілеріне МТЗ-82 тракторының кілті тапсырылды. Сондай-ақ, бірқатар адамдарға «Еңбек ардагері» медалі және «Ауыл шаруашылығы саласының үздігі» төсбелгісі мен «Құрмет грамотасы» ұсынылды.

Өз кезегінде «Жақсылық» шаруа қожалығының басшысы,  танымал спорт саңылағы «Қазақстанның Еңбек Ері» медалінің иегері Жақсылық Үшкемпіров: «Халқымызда «Еңбек етсең ерінбей, тояды қарның тіленбей» деген аталы сөз бар. Осы жетістіктеріміз  ұзақ жылдық табан ет, маңдай тердің бодауы. Біздің еңбегімізді  бағалап, осындай марапат ұсынып жатқан облыс басшыларына рахмет. Қорытып айтқанда, мұның барлығы  Елбасының сындарлы саясатының аясында жеткен тұғыры биік тәуелсіздігіміздің арқасы. Тәуелсіздігіміз мәңгілік, аспанымыз ашық болсын!» -деп ізгі тілегін жеткізді.

Бөлісу
Share on FacebookTweet about this on TwitterEmail this to someoneShare on VK