Облыстық қоғамдық даму басқармасына қарасты «Jetisý Jastary» коммуналдық мемлекеттік мекемесінің ұйымдастыруымен 16-35 жас аралығындағы облыстық шахмат чемпионаты өтті. «Royal Clash: Chess Tournament 2024 CUP» деп аталған зияткерлік сайыс «12 тамыз – Халықаралық жастар күні» ұлттық онкүндігіне арналды. Турнирға облыстың әр ауданы мен қаласынан 100-ге жуық қатысты. Олардың арасында Азия және халықаралық турнирлердің жеңімпаздары, әуесқой шахматшылар бар.
Терең ойды, көрегендікті талап ететін шахмат турнирінің жеңімпаздары бағалы және ақшалай сыйлықтармен марапатталды. Жарыс қорытындысы бойынша жалпы әуесқойлар арасында 1-ші орынды Сырым Байтілеу, 2-ші орынды Ерназар Исумбаев, 3-ші орынды Әлихан Хажатұлы еншілесе, қыздардың ішінен 1-ші орын Айнұр Қанатқызына, 2-ші орын Нұрикамал Болатбайға, 3-ші орын Феризат Мизамбаеваға бұйырды. Одан бөлек, 20 жасқа дейінгі жасөспірімдер мен жастар арасында 1-ші орынды Дамир Садуақас, 2-ші орын Нұрәділ Амангелді, 3-ші орынды Айбол Жұматай иеленді.
Өскелең ұрпаққа салауаты өмір салтын үйретіп, алыстағы жүрістерді көре білуге баулитын шахмат додасының жеңімпаздарын құттықтап, қатысушыларға алғыс білдірген облыстық Қоғамдық даму басқармасы басшысының орынбасары Ілияс Түстікбаев үздіктерді марапаттады.
