Бесіктен бейтке дейінгі әдеп-ғұрыптар

436
фото Үсен Өмірзақов

Талдықоғанда ҚР Жазушылар және Журналистер Одағының мүшесі, халықаралық Алаш сыйлығының иегері, танымал ақын Қасымхан Бегмановтың 60 жылдығына байланысты арнайы кездесу өтті. Жетісу жұртымен өткен жүздесуде  алдымен кемел ойлы қаламгердің «Дәстүр», «Кеше», «Бүгін», «Ертең» атты төрт томдық кітабының тұсауы кесілді.

фото Үсен Өмірзақ

Аталған кітаптарда қазақтың тал бесіктен жер бесікке дейінгі салт-дәстүр, әдеп-ғұрпы толық қамтылған. Оларды жазу үшін автор ұзақ еңбектенін, 250-ден астам сұрақ дайындаған. Әрі оған елімізге әйгілі тарихшылар, этнограф-ғалымдармен 40-қа жуық ғылым кадидаты жауап берген. Нақтырақ айтқанда бұл басылымдар ұлт құндылықтарын дәріптеп, рухани сананы қайта жаңғыртып жатқан бүгінгі таңда руханиятымызға қосылған үлкен қазына, бай мұра екені анық.

фото Үсен Өмірзақ

Қаламгердің жетісулық ақын-жазушылармен жүздесуі «Жастар» саябағындағы Мұзарт шыңының мұзбалағы, ақиық ақын Мұқағали Мақатаевтың еңселі ескерткішіне гүл шоқтарын  қоюдан басталды. Шараға Қазақстан Жазушылар Одағының Алматы облыстық филиалы ұйытқы болып, облыс әкімдігі қолдау көрсеткен. «Рухани жаңғыру» орталығында өткен басқосуда қазақтың ақын қыздарының бірі Зайда Елғондинова арнау өлеңін оқып, басқа да қаламгерлер Қасымқанның адами асыл қасиеттері мен шығармашылығы жайында орамды ойларын айтты. Қарымды қаламгер, филология ғылымдарының докторы, профессор Бауыржан Жақыпов: « Кейінгі жылдары Қасымхан Бегманов қазақтың салт-дәстүрін жаңғырту жолында көп еңбек сіңірді. Әсіресе, оның қазақтың танымал тарихшы, этнограф-ғалым, шежіреші, қоғам қайраткері Жағда Бабалықұлымен сұхбат ретінде жазылған кітабының орны бөлек. Сонымен бірге қазақтың салт-дәстүріне байланысты төрт томдық кітабының тұсаукесері Алматыда,  Талдықорғанда өтуде. Енді міне автор оқырмандармен кездесіп, жырсүйер қауымға өзінің отты жырларын ұсынып отыр. Мұндай дарынды тұлғаның әрбір шығармасы көп көңілінен орын алып, өскелең ұрпаққа өшпес үлгі-өнеге сыйлары сөзсіз» – деді.

 Кездесуде өңір өнерпаздары Қасымхан Бегмановтың  әндерін асқақтата шырқаса, жас жеткіншектер ойлы өлеңдерін оқып ізгі ілтипат білдірді. Сондай-ақ сол күні «Сүйінші сұрау», «Шашпау тағу», «Тұсау кесер» сынды  ұмыт бола бастаған рәсімдер өтеліп, ұлт құндылықтары ұлықталды.

Бөлісу
Share on FacebookTweet about this on TwitterEmail this to someoneShare on VK