Талдықорған қаласының барлық жаңалығының жаршысы болып келе жатқан «Талдықорған» қоғамдық-саяси газеті  өзіндік үні бар басылым.  Қазіргі таңда құрылғанына 28 жыл толған  үнжарияның өзіндік тарихы мен жолы, қолтаңбасы қалыптасып үлгерді. Басылымда бүгінде орны бар, қаламы жүйрік журналистер қауымы қызмет жасады.

Газеттің алғашқы редакторы Тұрлыхан Кәрім,  жауапты хатшы, одан кейінгі жылдары бас редакторы болған Мәулетхан Ақсанов, Тұрсын Шеңгелбаев,  Гүлжан Тұрсын, Ырысбай Кенжебаев, Вера Бобровская, фототілші Тілеш Бақаев,  Гүлайым Қылышпаева,  Асхат Бименбетов,Светлана Буратай, марқұм Кемел Құсайынов, Президенттің телерадио кешенінде табысты жұмыс жасаған Клара Қамарова, бүгінде облыстық «Огни Алатау» газетінің бас редакторы Атсалим Идигов, Ілияс Бияхметов, Баян Таңатарова, Сағыныш  Намазшамова, Кенжегүл Бұрқанбаева,  марқұм  танымал журналист, ақын Гүлайым Түстікбай,  Асхат Алтынбаев,  күні кеше Алматы облыстық «Жетісу» телеарнасы директорының  орынбасары қызметіне ауысқан газеттің бас редакторы Данияр Сейсенбаевпен  және басқа журналистер қауымымен бірге  қызмет жасадық және бірқатарымен әріптеспіз.

Жалпы, журналистика  — қиындығы мен қызығы қатар жүретін, көп ізденісті талап ететін сала. Үнемі ізденісте болуды, жаңаруды  қажет етеді. Жылт еткен жаңалықты жазумен шектелмей, өз еліміздің, облысымыз бен қаламыздың елең еткізер хабарлары, тарихи-танымдық, әлеуметтік- саяси тіршілігі, жол сапар, мәдениет пен өркниет болып тізбектеліп кете береді. Қазіргі тың өзгерістерден қалмауымыз  керек. Кезінде  біздің газет жанында «Қала тынысы» деп аталатын телехабар орталығы қызмет жасаған еді. Бірнеше жыл бұл тізгінді бүгінде газетіміздің бас редакторының орынбасары, танымал журналист Гүлжанат Нұршанова өз қолына алып,басқарды. Ол хабарлар  талдықорғандықтардың көзайымына айналды. Қаншама  операторлар, бейнеинженер, тілші азаматтар жұмыс жасады.

 Бүгінде ақпарат саласында өзіндік орны бар «Талдықорған» газетінің жеке сайты бар. Оқырмандардың  талап  — тілегіне сай қызмет көрсетіп, жаңа ақпараттық технологияларды меңгерудеміз.

Ал бір сәт  өткен тарихқа да көз жібергеніміз жөн болар. Журналистердің кәсіби мерекесі  қарсаңында әр жылдары осы басылымда жұмыс жасаған жандардың естелігін беруді жөн көрдік.

 

«Менің әдебиетке деген, жазуға деген әуестігім мектеп қабырғасынан басталды. Ең алдымен өлең жаза бастадым. Жоғары сыныптарда  әдебиетке деген құштарлығым тіпті  артты.  Шығарма жазсам, бірнешеу етіп жазамын, себебі өз қатарластарыма таратушы едім. Бауырларым мен апайларыма шығарма жазып беріп, олардың да көңілдерін табатынмын. Осылайша, Талдықорған пединституттың филология факультетіне құжаттарымды ойланбастан тапсырдым. Жоғары білім алдым.

 Мектепте жұмыс жасап жүрген кезім болатын. Қалада жарық көретін  «Талдықорған» газетіне  «тілшілік қызметке щақырамыз» деген  шағын ғана  хабарландыруды көзім шалды. Бұл -1993 жыл еді.  Газет редакциясына орналасып жұмыс жасаған кезім ең бір ұмытылмас кезең.  Балалық арман орындалды, бақыттан басым айналды. Газет бетіне шыққан аты-жөнімді көріп таңғалып,  анама апарып мақтандым.  Менің аты-жөнімді көріп, мақаламды  оқыған анам мен апам, елге адал қызмет жаса деп батасын берген еді.

 Алғашқы тапсырмалар, қызметтес адамдар қандай еді. Кілең бір сайдың тасындай дарындар ортасына тап болыппын.  Әлі күнге  бірге қызмет жасаған әріптестеріммен араласып тұрамын.

Әр очерк, әр репортажды жазып алған соң, елең еткізер бас тақырып іздеп есіміз шығушы еді. Бөлімде бәріміз ортақ шешімге келгенше дауласатынбыз. Әлі күнге есімде, құқық саласы қызметкерлеріне, Театр күні, өрт сөндірушілер бригадасынан  мақалалар жазушы едім. Ең алғаш  репортажым  балалар ойыншығын шығаратын «Арман» зауытынан жазылғаны есімде. Алып кәсіпорынның ішіне алғаш баруым. Тілеш аға суретке түсіріп жатыр. Цех басшысымен, кәсіпорын бастығымен сөйлесіп, бір күнімді арнадым.  Тілші деген  куәлігімді де көрсетпей өтіп кеткенмін. Аз жалақымен жұмыс жасайтын тілшілер  баспаханада кезекшілікті таңға дейін атқарушы еді. Ол кезде типография «Қайнар» аккумлятор зауыты жанындағы сілтілі аккумлятор шығаратын зауытының ішінде болатын. Бесінші шағын ауданнан әрі қарай жаяу кетуші едік.

Қазір білім саласында қызмет жасаймын. Шәкірттер тәрбиелеу ісіне үлес қосып келемін. Алайда,  екі тілде жеке-жеке шығатын «Талдықорған» газетінің  жаңадан ашылып, енді құрылған тұста орыс бөлімінде жұмыс жасадым. Редакцияда жұмыс жасаған  жылдарым ешқашан ұмытылмайды. Қамқор, жанашыр, білмегеніңді үйрететін тамаша жандармен  иық тіресе қаланың баспасөз айдынында жұмыла еңбек еттік.

 Әріптестерді алдағы келе жатқан кәсіби мереке- Журналистер күнімен шын жүректен құттықтаймын. Еңбектеріңізге табыс, амандық тілеймін»,-дейді  Гүлайым Қылышпаева.  Бүгінгі мерекеде ұмытпай газетті еске алып, естеліктерімен бөлісіп жатқан қызметтес, әріптестерге де мереке құтты болсын дегіміз келеді. Ақпарат айдынында қатар жүрген қаламдастарға да ұшқыр ой, ізденіс, шығармашылық табыс тілейміз.

 

Бөлісу
Share on FacebookTweet about this on TwitterEmail this to someoneShare on VK