Талдықорғанда халықаралық талаптарға сай келетін жүзу бассейні салынуда. Сыртқы пішіні балық силуэтіне ұқсайтын бұл нысан қаланың сәулетіне сән кіргізетін, әрі жергілікті жұртқа су спортымен айналысуға мүмкіндік беретін орталыққа айналмақ. Жоспарға сәйкес, спорт кешені күніне 750 адамға дейін қабылдай алады, — деп хабарлайды Таldykorgan-online.kz

Құрылыс жұмыстарын жүргізіп жатқан «Bazis Construction» мердігері осыған дейін «Алматы-Арена», «Нұрлы-тау» бизнес орталықтарын салған. Компания өкілдерінің айтуынша нысанның құрылысы шілденің аяғында толық аяқталып, тұрғындар игілігіне берілмек.

Атап айтсақ, 27 мың шаршы метрді алып жатқан аумақта бір емес, бірнеше бассейн орналасады, оның ішінде ересектер мен балаларға арналған бассейндер бар. Ең маңыздысы, мұнда 2 халықаралық стандартқа сай бассейн болады. Біріншісінің  ені 25, ұзындығы 52 метрге созылмақ. Ол  суға жүзу жарысына негізделген. Ал, екіншінде  5-тен 10 метрлік биіктіктен  атлеттер суға секіріп, үздіктерін анықтамақ. Сонымен қатар  әуесқойлар мен балаларға арналған бассейн де қарастырылған. Ал, ғимараттың екінші қабатында 7 спорт зал болады.

Бұдан бөлек, бұл арада суға жүзе алмайтындарға арналған арнайы «хауыздар», медициналық мекеме, жаттығу залдары, буфет және демалысқа қажетті басқа да орталықтар орналасады. Яғни, спортшыға қажет барлық жағдай қарастырылған. Жобаны әзірлеу кезінде оның көп функциялығына, ыңғайлығына да, эстетикалық келбетіне де көп көңіл бөлінген.

Тағы бір айта кететін жәйт, мұнда балаларын су спортына баулығысы келетіндер үшін арнайы оқу-жаттығу залдары жұмыс істейді. Су добы және суға секіру бойынша да тәжірибелі мамандардан тәлім ала аласыз. Ал, өңірдегі аз қамтылған отбасыларға бассейнге жазылуға жеңілдік жасалмақ.

Алматы облысының әкімі Амандық Баталовтың жіті бақылауымен салынып жатқан спорт кешенінде қауіпсіздік мәселесі бірінші кезекте қарастырылған. Өңір басшысы құрылыс алаңына барған кезде мамандарға осыны міндетті түрде ескеру қажеттігін тапсырған еді. Айтқандай-ақ, биіктігі 5,7 және 10 метр құрайтын мұнаралардың қауіпсіздік деңгейі жоғары дейді компания өкілдері. Жалпы, бассейнді салу барысында жаңа технологиялар мен заманауи материалдар пайдаланылған.

Суда жүзу орны қолданысқа берілгеннен кейін,  тұрғындар осы нысанда бос уақыттарын өткізіп, ауқымды спорттық сайыстарды тамашалауға мүмкіндік алады. Сондай-ақ, келешекте осы жерден әлемдік ареналарға шығатын, еліміздің абыройын асқақтататын спортшыар түлеп ұшатынына сенімдіміз.

Айта кетейік, халықаралық стандартқа сай спорт кешенінің құрылысы өткен жылдың көктем айында басталған.

Бөлісу
Share on FacebookTweet about this on TwitterEmail this to someoneShare on VK