Бүгін Талдықорғанда көпбалалы аналарға арналған 125 пәтерлі екі тұрғын үйдің құрылысы басталды, — деп хабарлайды taldykorgan-online.kz

Тұрғын үйдің қазығын қағуға шаһар басшысы мен бірге қаламыздың құрметті ақсақалдары, ақ жаулықты аналары қатысты. Салтанатты шарада сөз алған қала әкімі көпшілікті игі істің басталуымен құттықтап, өзінің жылы лебізін білдірді.

Суретті түсірген Дмитрий Ерофеев

– Баршаңызға мәлім жыл сайын Талдықорған қаласында көптеген әдемі ғимараттар бой көтеруде. Міне, солардың қатарына көпбалалы аналарға арналған 125 пәтерлі екі тұрғын үй кіргелі отыр. Бұл өте қуанышты жағдай. Сонымен қатар, келесі аптада 100 коттедждің құрылысын бастау жоспарымызда бар. Ол да өз кезегінде көпбалалы аналарға берілетін болады. Одан бөлек, Алматыдан кіреберіс жердің сол жағында 600 коттедждің орны бар. Бүгінгі күні сондағы 155 баспананың құрылыс аяқталуға жақын. Облыс әкімінің тапсырмасы бойынша, жуық арада соның ішіндегі 70 коттеджді де көпбалалы аналарға беретін боламыз, — деді Ғалымжан Әбдірайымов.

Сондай-ақ, қуанышты жайтқа куә болған ақсақалдар мен мешіт имамдары ақ тілегін ақтарып, батасын берді.

125 пәтерлі тұрғын үйдің құрылысын «LEPES» ЖШС өз қаражаттары есебінен жүргізуде. Оның 100 пәтері 3 бөлмеден, қалған 25 пәтері 4 бөлмеден тұрады. Үйдің құрылысы біткен бойда жергілікті әкімдік дайын үйді сатып алмақ. Мамандар құрылыс жұмыстары үстіміздегі жылдың соңына қарай аяқталады дейді.

Айта кетейік, қазіргі таңда облыс орталығында 3037 көпбалалы ана бар. Бүгінгі күні соның 1146-сы үй кезегінде тұр.

Бөлісу
Share on FacebookTweet about this on TwitterEmail this to someoneShare on VK