Талдықорған қаласының №1 мамандандырылған балалар мен жасөспірімдер спорт мектебінде жас спортшылар шыңдалу үстінде. Талантты жеткіншектердің көрсетіп жүрген жетістіктері де айтарлықтай. Оқушылар әсіресе соңғы уақыттар да өте жақсы нәтиже көрсетіп, бірнеше жарыстан олжамен оралған, — деп хабарлайды taldykorgan-online.kz

Мәселен, 26-шы қазан мен 1-ші қараша күндері аралығында өткен Щучинск қаласындағы баскетболдан ел біріншілігінде 2004-2005 жылғы жасөспірімдер жақсы өнер көрсетіп келді. Спорт мектебінің шәкірттері командалық сайыста топ жарып, І орынды иеленген.

Сонымен қатар, 14 қазан күні Алматы қаласында өткен марафон жарысында (Алматинский полумарафон 2018) Мәдина Керімова алтыннан алқа тағып қайтты. Одан бөлек, 20-шы қазанда болған Қазақстан Республикасының Кубогында «Жеңіл атлетика» бөлімшесінің оқушылары тағы да үздіктер қатарынан көрінді. Атап айтсақ, Тимур Баймұрат үшінші орын алса, Данияр Орманғали қола медальді еншілеген. Ал, Мәдина Керімова бірінші тұғырдан қол бұлғады.

Мектеп оқушылары белбеу күресінен де осал емес екендіктерін байқатып жүр. Бұл спорт түрінен 2003, 2005, 2006 және 2008 жылғы жасөспірімдер Алматы облысының ашық біріншілігінде намысты қолдан бермеді. 28-ші қазанда өткен жарыста Мейіржан Жұмаш, Аршат Нұрманов, Бейбарыс Айдынұр және Барел Жанатұлы өз салмақтарында қарсылас шақ келтірмей І орынды ұтып алған. Ал, Әділет Батырбек ІІ тұғырға шықса, Рысбек Шойбек пен Мейрамбек Нүкен үздік үштіктен көрініп отыр. Сонымен қатар, Багаманың Нассау қаласында өткен дзюдодан юниорлар арасындағы Әлем Чемпионатында Камила Берліқаш пен Мөлдір Нарынова үшінші орынды олжалап келді.

Жаттықтырушылар «Еркін күрес» бөлімшесіне қатыстып жүрген спортшылардан да болашақта көп үміт күтетіндіктерін айтады. Бүгінде жас балуандардың қарқыны жаман емес. Мәселен, жақында Дидар Нұрахмет пен Әділбек Ботабек Шымкент қаласында өткен жастар арасындағы ХХІІІ – Халықаралық турнирден қола медальмен оралды.

Қазіргі таңда жастар арасында «Джиу-джитсу» кеңінен қанат жайып келеді. Аталмыш мектепте де спорттың бұл түрімен шұғылданатын жас жеткіншектердің қатары аз емес. Оқушылар уақыт озған сайын шыңдалып, жарыстарда жақсы нәтиже көрсетіп жүр. Соның бір айғағы ретінде Жаркент қаласында өткен Алматы облысының ашық жеке командалық турнирін айтуға болады. Дүбірлі додада С.Сарсенұлы қос сайыс қорытындысы бойынша І және ІІ орынды алса, Әнуар Жақыпов қоладан алқа тағынды. Ал, Азамат Құрметқанұлы үздік үштікті қанағат тұтты.

Сондай-ақ, 12-сі мен 21-ші қазан аралығында Түркияның Анталия қаласында армерстлингтан (қол күрес) жалауын желбіреткен Әлем чемпионатында Талдықорған қаласы № 1 МБЖСМ-нің спортшысы Евгения Телятникова қола медаль еншілеп, жүлдегер атанды.

Иә, бұл мектеп шәкірттерінің соңғы айларда жеткен жетістіктері. Талантты спортшылардың бұдан да биік шыңдарды бағындырарына сенімдіміз. Тек қана бап пен бақ таласқа түсер сәтте сәттілік серік болса деген тілегіміз бар.

Бөлісу
Share on FacebookTweet about this on TwitterEmail this to someoneShare on VK