Қазақстанда тас жолдардың жабылғанына қарамастан жолға шығатын жүргізушілерге айыппұл салынуы мүмкін. Ішкі істер министрлігі жаңа норма енгізу мәселесін талқылап жатыр, — деп хабарлайды Sputnik Қазақстанға сілтеме жасаған taldykorgan-online.kz

«Мұндай мәселе талқыланып жатыр. Естеріңізде болса, Владимир Божко төтенше жағдай министрі болған кезде, ауа райының қолайсыздығына байланысты трасса жабылғанына қарамастан жолға шыққан жүргізушілерді жауапқа тартуды ұсынған болатын. Қазір бұл мәселе де талқыланып жатыр», — деді ішкі істер министрлігі төтенше жағдайлар комитетінің төрағасы Владимир Беккер үкіметте БАҚ өкілдеріне.

Беккердің сөзінше, жаңа норманы әкімшілік құқық бұзушылықтар туралы кодекске енгізу ұсынылып отыр.

Қазақстан автожолдарында ауа райының нашарлауына байланысты қозғалыс тоқтатылады. Жолда қалған жүргізушілер 1403 нөміріне хабарласып, көмек сұрай алады.

Бөлісу
Share on FacebookTweet about this on TwitterEmail this to someoneShare on VK