Цифрлық эфирлік телехабар таратуға (ЦЭТТ) көшу –«Цифрлы Қазақстан» бағдарламасы аясында жүзеге асырылып жатқан  әлеуметтік мемлекеттік жоба. Оның басты міндеті – қала мен ауылдың әрбір тұрғынын отандық телеарналармен тегін  қамтамасыз ету.

 Бүгінгі таңда цифрлық эфирлік хабар тарату  Қазақстан халқының 83 пайызын  қамтып үлгерді. 446 радиотелевизиялық станция (РТС)  салынып, жаңғыртылды. Цифрлық эфирлік телехабар тарату желісімен қамтылмаған елді мекендер OTAU TV ұлттық жерсеріктік телевизиясына қосылады.

Өткен жылдың күзінде Маңғыстау, Түркістан, Жамбыл облыстары мен Шымкент қаласының тұрғындары цифрлық хабар таратуға көшіп, қазіргі кезде отандық арналарды тегін көруде.

2019 жылдың маусымында жаңа желігеПавлодар, Қостанай және Алматы облыстары көшеді. 2020 жылдың аяғына дейін Шығыс Қазақстан, Солтүстік Қазақстан, Қарағанды, Атырау, Қызылорда облыстары қосылады. Ал Батыс Қазақстан, Ақмола, Ақтөбе облыстары, Астана және Алматы қалалары цифрлық хабар таратуға 2021 жылы өтеді.

Осылайша мемлекет қала мен ауыл тұрғындары арасындағы ақпараттық теңсіздік проблемасын шешеді.

Демек, бұған дейін 4-5 қазақстандық телеарна көріп келген ауыл халқы енді 15 шақты телеарнаны тамашалайды деген сөз. Ал облыс орталықтары мен оған жақын маңдағы елді мекендерде дыбыс пен бейнені цифрлық сапада көрсететін 30 шақты телеарна қолжетімді болады.

Бұл үшін халыққа қымбат тұратын жерсеріктік «тәрелкелерді» орнатып, абоненттік төлем төлеу қажет болмайды. Әркім өз теледидарын қарапайым дециметрлік антенна мен цифрлық сигнал қабылдайтын жабдықтың (ресивер) көмегімен цифрлық эфирлік хабар таратуға қосса, жетіп жатыр.

Қабылдағыштар техника сататын дүкендер мен базарларда сатылады, бағасы өндірушіге байланысты 3000 теңгеден басталады.

Атаулы әлеуметтік көмек алатындар үшін қабылдағыштар жергілікті әкімдіктерден тегін беріледі.

Бөлісу
Share on FacebookTweet about this on TwitterEmail this to someoneShare on VK